Hivi majuzi tu, mimi na besti yangu Habiba tulikuwa tunaongelea kuhusu mipango yetu ya maisha. Habiba anataka kuwa mwalimu,mimi nimekuwa nikifiria kuhusu kusomea u Nesi. Tatizo ada ni kubwa mno! Kwa hiyo kwa pamoja tuliamua kuanza kujiwekea akiba kwa ajili ya Ada za shule, limekuwa jambo zuri sana maana:

Tunajaliana.
Tuliamua kuweka akiba pamoja kwa sababu tunaaminiana sana! Mwanzo, tulielezana malengo yetu na kila mtu akaandika kwenye kidaftari chake . Kila wakati tunapotenga pesa za akiba, huwa tunaandika kiwango na tarehe katika madaftari yetu. Hutusaidia kuona jinsi tunavyopiga hatua na inaturahisishia kujulishana maendeleo ya kila mmoja – kitu ambacho tulikubaliana kukifanya kila baada ya wiki mbili.

Tunasaidiana kujizuia/Kuishinda tamaa.
Kuwa na mtu ninaeshirikiana nae katika kuweka akiba humaanisha kuwa hata kama tukienda kula bata na marafiki zetu na wanataka tufanye matanuzi, ni rahisi kujizuia kwa sababu mimi na Habiba huwa letu moja na hata kama asipokuwepo, ninajua baadaye ntampa tu ripoti maana lazima tu ataniuliza, jambo ambalo linaniepusha kufanya matumizi mabaya ya pesa.

Tunajinunulia zawadi za bei chee kwa ajili ya kujipongeza.
Sote wawili tumejiwekea malengo ambayo sio makubwa ya kiasi gani cha hela ambacho tungependa kuweka kama akiba kila mwezi. Tukitimiza tu lengo, tunajipongeza kwa kujipa raha kidogo mfano: huwa twajinunulia "Soda"

Huwa tunatiana Moyo
Hata pale ninapoona kuwa ninashindwa kutimiza lengo langu na kukata tamaa, Huwa namtafuta Habiba na kuongea nae, huwa hunitia moyo nisonge mbele. Kuweka akiba kwa kushirikiana na mtu mwingine husaidia sana kutiana moyo pale tunapoona hatujafikisha malengo na pale tunapofeli.

Tunasaidiana.
Habiba alipohitajika kuhudhuria harusi wikiendi chache zilizopita, alijua kuwa alihitaji nguo mpya, lakini hakutaka kutumia akiba yake. Badala yake, aliomba nimuazime gauni langu lile nilivaa siku ya "Kicheni pati ya Asha" ili alivae siku hiyo. Kwa kusaidiana huku kama kuazimana nguo inatusaidia kuokoa pesa nyingi zaidi.